ज्वारीपासून दैनंदिन जेवणात बनवल्या जाणाऱ्या भाकरी शिवाय कोवळा हुरडा, आंबील, लाह्या, स्टार्च, ग्लुकोज व अल्कोहल देखील बनवले जाते. काही ज्वारीचे वाण हे फक्त हिरव्या चाऱ्याकरिता लावले जातात. ज्वारी उत्पादनाच्या बाबतीत देशभरात महाराष्ट्र अग्रेसर आहे, त्यानंतर कर्नाटक आणि मध्य प्रदेश यांचा क्रमांक लागतो. महारष्ट्रात उस्मानाबाद, नांदेड, परभणी, कोल्हापूर, अमरावती, अहमदनगर, सोलापूर, यवतमाळ, बुलढाणा या जिल्ह्यात मुख्यता पिकवली जाते. महाराष्ट्रात खरीप व रब्बी अशा दोन्ही हंगामात ज्वारी घेतली जाते.